2016-09-12

Бать керка

Олӧмыс тюрӧ водзӧ. Быдмӧны челядь, вежсьӧны олӧм вылӧ видзӧдласъясыс, майшасьӧмъясыс. Пыр гежӧдджыка и гежӧдджыка кайлывла чужан сиктӧ. Ӧд воддза моз оз паныдав менӧ мамӧ, оз кыв батьлӧн гӧлӧс...  Но нем кежлӧ коляс вежӧрын шуда челядьдырӧй...

* * *

Мунсьӧма кор сиктысь — эг и тӧдлы.
Пышйысь кадтӧ он тай косӧд бӧр.
Ӧні менӧ карсьыд он нин вӧтлы,
Тӧдтӧммӧма чужан керка йӧр.

Муса гортӧй, шыльыд керка пельӧс,
Батьлысь сямлун висьталӧ быд кер.
Аслад мичнад гажӧдан тэ керӧс,
Тэнӧ мыськиг, радлӧ тувсов зэр.

Тані кольліс шуда челядьдырӧй,
Киссис серам, шог ни тӧжд эз вӧв.
Сӧмын шонді кымӧр улӧ пырис,
Кыпыд олан русӧ нуис тӧв.

Шудыс-гажыс кусі ӧти здукӧн,
Оз нин юргы батьлӧн чорыд кыв.
Оз нин ӧвтышт мамлӧн пӧжас дукӧн,
Ог нин кывлы: «Натук, муса ныв!»

Шипер вывсьыс лымйыс лӧня сылӧ, 
Сідзкӧ, тӧлыс сиктын дыр оз ов.
Ветла Сёрд ты бокӧ, шойна вылӧ,
Гашкӧ, сэні личалыштас лов.


2008 во, ӧшым 6-ӧд лун


Комментариев нет:

Отправить комментарий