Тайӧ войыс бара ичӧт унма...

Тайӧ войыс бара ичӧт унма,
Синмӧй ывла вывсьыс дыр оз кеж.
Мый эськӧ пыр виччыся ме думнам?
Мыйла менсьым петкӧдлан тэ веж?

Но он мыччысь, пемыдас и кусан,
Миян костын туйяс да сьӧд вӧр.
Тэ мем ставсьыс дона, ставсьыс муса,
Зарни ёкмыль, дона сьӧлӧмшӧр.

Эска, туйыс миян костын югдас,
Менам синмӧй аддзас тэнсьыд син.
Гашкӧ, сэки синва петны дугдас,
Полысь сьӧлӧм аддзас ассьыс ин.

(2004-ӧд во)