Сьӧм разӧдан лун

 Талун муні удж вылӧ, кыдзи и пыр, 9 час кежлӧ. Серӧданас пырджык этшаджык уджыс овлывлӧ, но талун деньга разӧдан лун. Быд тӧлысь ми разӧдам разӧвӧй порученньӧяс. Йӧзыс жырйысь вештысясны, а канмуыс кымынкӧ прӧчент бӧр бергӧдӧ налы. Дерт, оз ставлы. Колӧ, бара жӧ, торъя документъяс чукӧртны. Пырджык тайӧ пенсионеръяс. Кор сійӧ луныс матыстчыны кутас, пошта вывса телепон оз и лӧньлы, ӧтырыш троньгӧны: кодлыкӧ колӧ вайны гортӧдзыс сьӧмсӧ, кодкӧ вайигас абу вӧлӧма гортас, да выльысь нуны колӧ. Кытӧнкӧ шӧйтӧны, а пошта вылӧдз волыны оз убӧлитны. Но, дерт, оз ставныс и вермыны, эмӧсь и куйлысь йӧз, да налы быть вай гортӧдзыс. Тайӧ миян удж.

 Быдсяматорйыс жӧ овлӧ сьӧмтӧ разӧдігӧн. Талун пыри ӧти нывбаба дорӧ, а сійӧ ме вылӧ зэээв аслысног видзӧдліс. Ті пӧ век вайланныд меным деньгасӧ, юалӧ. Мися ог, отпускасьла да ог век. Водзыннас пӧ менӧ ылӧдлісны, аньыс шуис. Кагаа ныв пӧ воліс, сетіс  1000 шайт да муніс. А сэсся  выльысь локтас,  шуӧ, нинӧмӧн пӧ квартираысь вештысьны, да бӧр лои сылы сетны 1000 шайттӧ.

Но, думышта, менӧ чайтӧ, гашкӧ. Шуа, воддза тӧлысяс мися ачым волі да! Нывкакӧд жӧ мися вӧлі. Эн пӧ тэ вӧв, шуӧ, сійӧ пӧ томджык. А ме пӧрысь ли мый? Абу пӧрысь, но сійӧ томджык. А колӧкӧ пӧ ме мыйкӧ сорала. Но вот, а ме нин повзьылі: оз-ӧ нин кӧсйы менӧ прӧстӧсьыс мыждыны.

 Мӧдлаӧ пыри да сеті 780 шайт-сӧ 500, 100 и 100, 50 и 30-сӧ мелочӧн. Мортыд сюйис мелочсӧ зептас и кутіс шуны ті пӧ меным лёка сетінныд. Ме сылы петкӧдла сідз да тадз: со 700-ыс, танӧ 50-ыс,а 30-сӧ зептад сюйинныд. А сійӧ шуӧ кутшӧм пӧ разница мый ме зептӧ сюйи,но ог пӧ гӧгӧрво кыдз сетінныд, 700-сӧ пӧ аддза,а 80-сӧ пӧ ог. Ме сылы гораджыка тӧлкуйта, мый зептас. Сэсся кисӧ сюйліс да гӧгӧрвоис жӧ. Извинитӧй пӧ.

 Но меся талун и лун! Ен отсӧгӧн эштіс жӧ сэсся деньга разӧдӧмӧй. Локті пошта вылӧ, а пызан тыр тэчӧмаӧсь «Китай»! Тадз ми шуам ичӧт пакетъяс (бандерольяс), кодъяс воӧны Китайысь. Асланым этша на тӧварыс да, йӧзыс Китайысь судзӧдӧны интернет пыр. Быд сикас «лӧпсӧ»: ручкасянь пальтоӧдз. И миянлы колӧ ставсӧ сійӧс разӧдны. Кызджыкъяссӧ колям пошта вылӧ, извещение гижам да, а вӧсньыджыкъяссӧ новлам пошта яшшикъясӧ.

     А нӧшта миянӧс кутісны тыртны рекламаясӧн. Абу тай жаль бумагаыс! Пошта жыр джынйыс тэчасны, ветлӧдлыны некыт. А разӧдны сійӧс колӧ 3 лунӧн. Ог на удитӧй ӧти гӧрасӧ разӧдны - мӧд нин виччысьӧ. Зэв эськӧ лӧсьыда сиктад найӧн пач ломзьӧ да...